1Cor 4 | GAM | STEP | Embe mal ge, ye embe dje kanne. Na Apolos boll, Krais kogoye una kiwa mormoll dje kanne. God kandja seke paro mal ge, une no awika, no kantau wopake ye, una mor al dje aunmon dje ye embe kanne.

1 Corinthians 4

Krais aposelye kambono

1 Embe mal ge, ye embe dje kanne. Na Apolos boll, Krais kogoye una kiwa mormoll dje kanne. God kandja seke paro mal ge, une no awika, no kantau wopake ye, una mor al dje aunmon dje ye embe kanne. 2 Una wal kantau yene ge, kantau wopake yene mal. 3 Alla ye na wal kantau wopake nayendo dje kanne mo, una ta na wal kantau wopake nayendo dje kanne ge, na pille we nayendo. Na nanam kogo yendo mal ge na omuk natondo. 4 Na nanam wambo naparo dje kando, ba na wambo paro mo naparo Iwa Kerman yene djinda.

5 Embe mal ge, ipon una kogo wopake yenj mo ke yenj ge, ye nadjine. Are Iwa Kerman er yem wonda poke, wal seke dongall paro ge une dje pene woro, nonekne kogo embe embe yepin we dje pupin mal ge une dje pene worda. Kune ge, nono kogo ke wopake yembon mal ge, yene djinda. Ge ke, ge wopake we dje yene djinda.

6 Agana kambono, na ipon ye pille kandja su ye dje aundo ge nanam ne, Apolos pille dje ye aundo. Ye no soka pille Baibel kandja djindo mal embe yene, kandja gun ta dje pakna woro djine dje pille no djinmon. Iwa ta kandjiye amblo pla woro, ta amblo kal woro embe nayene. 7 Una ne mal dji, ni iwa kerman moren, una ta tom moro ne? Ni wal porapora paro ge God awi paro. Ni nenem kandjin amblo pla woro, na kogo embe yell we djinden ge kune nayendo, God awi al ni kogo yenden.

8 Nono wal porapora ipin pora dji we dje ye embe kaninj. Ye wal wopake i pagle, ye wopake mor dje kaninj. No ye boll aike king mal embe mopon ba, ye yenekne king mopin pora djindo dje pir. Ye king kaima moi dal, na wo piyo. Wo piyo ge, ye embe moi dal, no ye boll aike king mopon. 9 No ye boll aike king mopon ba na embe dje kando. God no aposel i are kaima wori mormon. Kot dji pora dji, una no to goye mal mormon. To goye al ge una dumo yemyem moye ge wo kanne. Tau agelo boll aike kanneke, no embe mopon. 10 No Krais kandjiye al, una dall mal embe mormon ba ye nomane kerman paraka mor! No yembene naparo ba ye yembene dongall paro! Ye kandjine kerman paro ba no kandjine naparo! 11 Asa ne, ipon yero ge, no koll tondaka, numbkane asip tondaka, konkunom gole wormonaka, una wo no tonjka, no numbine nayeraka, mormon. 12 No aglene al kogo yembe yenmon. Una wo no kandja ke dje aumaka, God ye wopake ye aunda we dje yem woro aupin. Una no ye ke ye aumaka, no kiye dje molo kandja dje yem naworpin. 13 Una no kandjine abir ge, no kandja wopake dje yem wormon. Makimb una wal ta kane kere, pup to seke worinj mal ge, no embe mormon. Asa mopin ipon mormon ge wal ke embe mal mormon.

14 Na kandja ipon manda dje ye aundo ge, ye ngadill goye dje na nadjindo. Ye na wombana mor pille, ye singare pai mal yene dje, na kandja dje ye aundo. 15 Una ten tausen (10,000) ye Krais kandjiye dje aune ba, ye nane merke namor, na taimane moro. Na ye Krais Jisas kandjiyembe wopake dje ye awill al ge, na ye nane moro. 16 Embe mal ge, na singare yendo mal, ye karkar yene.

17 Ye karkar yene dje pille, na Timoti ye mor al dje worno. Iwa Kerman kandjiye al Timoti ge na wombana, na wopake kando iwa. Iwa Kerman kogoye paro al ge, une kogo wopake yendo. Pillgi djinj una mor al, na Krais Jisas kandjiye dje una aundo mal, Timoti ye mor al wo kandja ge dje awo, ye nomane to mage aunda.

18 Na ye mor al nawono dje pir ge, ye una pende kandja napi mal embe waninj. 19 Ba Iwa Kerman kapla we dji dal, na ye mor al ola dje wono. Woll dal, na kanno, una kandja napi una mor ge kandja kiwa djine mo, kandja God yembe dongall boll kandja dine dje na embe kanno. 20 Ge God dumoye wopake kantau yendo ge, kandja kiwa boll kantau nayendo. Une yembe dongall boll kantau yendo pille, ga kandja dine mal kanno. 21 Ye namba mal piye? Na ye boll wono ge, singare namba mal ye wono? Na ka ullngub iwo ye tano mo? Mo, na wo ye wopake kane, kiye dje moyo mo? Ye namba we dje pir?